കല്ല് കളിക്കുവാന്‍ വരുന്നുണ്ടോ..?

കല്ലു കളിക്കുവാന്‍ വരുന്നുണ്ടോ..?

കൊത്തു കല്ലുകളിക്കുവാന്‍

വരുന്നുണ്ടോ....?

പുള്ളിപാവാടക്കാരി കൂട്ടുകാരീ

എണ്ണമയമില്ലാത്ത മുടി

പാറിക്കളിപ്പിച്ചുകൊണ്ട്

കണ്ണുതെള്ളിച്ചെന്തിങ്ങനെ

നോക്കുന്നതെന്നെ നീ

എന്നെപ്പോലെ മുടി

പിന്നിക്കെട്ടിയിട്ടു നല്കാന്‍

നിനക്കുമമ്മയോടു പറഞ്ഞു കൂടെ

ഇല്ലായ്മ കൊണ്ട് മേഞ്ഞ നിന്‍

വീടിനു മുന്നില്‍

വല്ലായ്മയൊടെയാണെങ്കിലും

ഞാന്‍ വന്നു നില്പതു കണ്ടില്ലേ

ഇന്നു സ്കൂളില്ലെന്ന കാര്യവും

നീ മറന്നുപോയോ....?

കല്ല് കളിക്കുവാന്‍ വരുന്നുണ്ടോ

വന്നാലും കൊള്ളാം.....

വന്നില്ലേലും കൊളളാം.....

കള്ളക്കളി പാടില്ല...പാടില്ല

ഇപ്പഴേ പറഞ്ഞേക്കാം....

കണ്ണൊന്നു തെറ്റിയാല്

നീ പണ്ടേ കൌശലക്കാരി

കളിയില്‍ തോക്കുമെന്നാകുമ്പോള്‍

കല്ലുവാരി കളത്തില് തുപ്പിയെടുന്ന

നിന് ശീലവും നന്നല്ല......

എന്നിട്ട് ദൂരെ നിന്ന് പിന്നെന്നെ

കൊഞ്ഞനം കുത്തി കാണിച്ചാലുണ്ടല്ലോ

വഴിയെഴുതി ചെയ്യേണ്ട

പുള്ളിക്കാരന് കണക്കിനെ

ഞാനിനിമേല്‍ നിനക്ക്കാണിച്ചു

നല്കില്ല....

വള്ളിച്ചൂരലില്‍

നീ നിന്നു പുളയും.........!

നല്ല നഖം വളരുന്നുണേടെന്റെ

കൈയിലുമോര്മ്മ വേണം....!

കല്ലു കളിക്കാന്‍ വരുന്നുണ്ടോ...?

വെള്ളാരം കല്ലുകളഞ്ചാറു

പെറുക്കി ഞാന്‍

മഞ്ചാടി മരപ്പൊത്തിലൊളിപ്പിച്ചിട്ടുണ്ട്

ഇത്തിരി നേരം കിട്ടുമ്പൊഴൊക്കെയും

ഓടിച്ചെന്നാ മരത്തണലില്‍

ചമ്രം പൊടിഞ്ഞിരിക്കണം

ഒറ്റയിരട്ട പകുത്തു വെച്ച്

ഒറ്റെയൊരെണ്ണം മാത്രം

മുകളിലോക്കറിഞ്ഞ്

പൊട്ടിച്ചിരിക്കുന്ന

കുപ്പിവള താളത്തിനൊപ്പിച്ച്

നീയത് കൈപ്പിടിയിലൊതുക്കുന്നത്

കാണാനെത്ര ഭംഗിയാണെങ്കിലും

ഞാനത് സമ്മതിച്ചു നല്കില്ല....

നിന്‍ കൊച്ചു കൈപ്പത്തിപ്പുറത്തും

എത്ര അനുസരണയോടെയാണകല്ലുകള്‍

മൊത്തത്തില്‍ വന്നു വീഴുന്നതും

തങ്ങളില്‍ തങ്ങളില്‍

കൊള്ളിച്ചു കൊള്ളിച്ചവസാനം

പിന്നെയുമാക്കല്ലുകള്‍

നിന്‍ കൈകളില്‍ തന്നെയിരിക്കയാണോ..?

കല്ലു കളിച്ച് നേരവും

പോയതറിഞ്ഞില്ലയിന്നലെ

പുല്ലരിഞ്ഞു വെയ്ക്കാത്തതിന്

നിന്നമ്മ ചുള്ളിക്കമ്പുകൊണ്ട്

വരിയുന്നത് ഞാനും കണ്ടതാണേ

എന്നാലും സാരമില്ല...

കല്ലുകളിക്കാന്‍ വരുന്നുണ്ടോ

കല്ലുകളിക്കാന്‍ വരുന്നുണ്ടോ..
പുള്ളിപാവാടക്കാരി കൂട്ടുകാരീ...

അവസാനത്തെ കമ്പി......!!

( ഇന്നലെ നവംബര്‍ 7 എന്റെ എച്ചെടുപ്പിന്റെ ടെസ്റ്റായിരുന്നു......!!)

പിന്നിലേതോ കോണിലാ

കമ്പി വീണുകിടപ്പുണ്ട്...

സ്പന്ദനങ്ങളൊന്നുമേ

നിലച്ചാറിയിട്ടില്ലതിനിപ്പോഴും...!

ചങ്കിലെ തീയുമൊന്നാളി

യണഞ്ഞതേയുള്ളൂ...

ഒന്നും മനപൂര്‍വ്വമായിരുന്നില്ലല്ലോ

സുന്ദരീ നിന്നെ വന്ന് ചാരിയത്

.............പൊറുക്കുക

ഒന്നു വേഗമെഴുന്നേറ്റു നിന്ന്

പുഞ്ചിരിച്ചിടാമോ..........?

ഒന്നുമേ സംഭവിക്കാത്തതു

പോല്‍...

ഹന്ത..കഷ്ടമേ എന്തു ചെയ്യാം

എന്നെ കൊന്നു തിന്നുവാന്‍

പാകത്തില്‍ രണ്ടുകണ്ണുകള്

പിന്നില് നില്ക്കുന്നത്

നിങ്ങളും,കണ്ടില്ലേ...........?

ചെന്നിടട്ടെ ഞാന്‍....

ചെവിപൊത്തി.........!

രണ്ടുമാസത്തിലേറെ നീണ്ടു

നിന്നൊരു പരിശ്രമം

വെറുമൊരു കമ്പിയില്‍ത്തട്ടി

തകര്‍ന്നു പോകുവാന്‍

പാടുളളതാണോ....?

രണ്ടാഴ്ച കഴിഞ്ഞ്

പിന്നെയും കാണാം......

കാക്കുമാക്കോ.......കണ്ടു പിടിച്ചേ......

കാക്കുമാക്കോ.....കാക്കുമാക്കോ

കണ്ടു പിടിച്ചേ...കണ്ടു പിടിച്ചേ...

കള്ളചെക്കനെ കണ്ടു പിടിച്ചേ...

കാക്കുമാക്കോ.....കാക്കുമാക്കോ

കളളച്ചെറുക്കന്റെ കള്ളത്തരവും

കണ്ടു പിടിച്ചേ.....!

കണ്ണൊന്ന് തെറ്റിയ നേരത്ത്

പുത്തന്‍ പിള്ളക്കിടക്ക മുഴുവന്‍

മുള്ളിനനച്ചേ........മുള്ളിനനച്ചേ........
തമ്മില്‍ തമ്മില്‍നോക്കിയിരിക്കേ
പല്ലില്ലാ മോണകള്‍ 
കാട്ടി ചിരിച്ചേ........
വാക്കുകള്‍ ചൊല്ലി പറയേ
കാക്കിരി പൂക്കിരി 
എന്ന് ചിലച്ചേ......

കാക്കുമാക്കോ.....കാക്കുമാക്കോ

കണ്ടു പിടിച്ചേ...കണ്ടു പിടിച്ചേ...

തൊള്ള തുറന്നു കരയുകയാണല്ലോ 

കളളപ്പാട്ടൊക്കെ ഉണ്ടാക്കി
പാടുന്നുണ്ടെന്നാലും........
പണ്ടേപ്പോലത് ഏശുന്നില്ലേ..............

അമ്മേ വായോ..... അമ്മേ വായോ... 

അമ്മിഞ്ഞതായോ അമ്മിഞ്ഞതായോ

പിന്നേം ...പിന്നേം....
ഉണ്ണി വയറു വിശക്കുന്നേ... 
കുഞ്ഞി തൊണ്ട വരളുന്നേ....
പിഞ്ചിളം കാലുകള്‍ തളരുന്നേ... 

കാക്കുമാക്കോ.....കാക്കുമാക്കോ

കണ്ടു പിടിച്ചേ...കണ്ടു പിടിച്ചേ...

കള്ളചെക്കനെ കണ്ടു പിടിച്ചേ...

തട്ടങ്ങള്‍ ഇളകുമ്പോള്‍.......

കൊച്ചു പെരുന്നാളിന്റെയന്ന്

നെയ്ച്ചോറ് വെച്ചു വിളമ്പവേ

പെട്ടന്നക്കരയുള്ളോരിക്കാനെ

ക്കുറിച്ചോര്‍ത്തുപോയാമിന

കൊച്ചരിയിട്ടു വേവിച്ചൊരാ

വട്ടചെമ്പു തണുത്തിട്ടും

ഉള്ളിലെ തീ

കെട്ടടങ്ങിയതേയില്ല...

എത്രനാളായൊന്ന് വിളിച്ചിട്ട്...?

മെക്കാ മദീനാ നാടാണതെങ്കിലും

ഉഷ്ണ മരുഭൂമിയല്ലേ.......?

ചക്രം തിരിച്ചു പായുന്ന

ജോലി എത്ര ഭയാനകം...!

നിത്യവും നാം കാണുന്നതല്ലേ....?
ചുട്ടു പൊള്ളും മണല്ത്തരി പോലെ

ഇത്തിരി പരിഭവ കൂടുതലുണ്ട് പണ്ടേ....

കിട്ടിയ പൊന്നു കുറഞ്ഞു പോയത്രെ....

പെറ്റു കൂട്ടിയതോ....

മൂന്നും പെണ്കുരുന്നുകള്‍....!!!

പടച്ച തമ്പുരാനേ

നീ പെണ്ണിനെ പണിച്ചു വിട്ടത്

പഴിച്ചു കൊല്ലുവാനോ...?

ഉച്ചവെയില്‍ ചാഞ്ഞൊരുനേരം

കതകടച്ചൊറ്റയ്ക്ക്

മുറിയില്‍‍ പോയിരുന്നു

കരഞ്ഞേറനേരം....

മച്ചിന്റെ കോണിലിരുന്നേതോ

കൊച്ചരി പ്രാവ് കുറുകി

വിളിച്ചൂ....

നിക്കാഹിന്റെയന്നെന്നപോലെ

വീടണഞ്ഞ്......

ആളുകള്‍ പിരിഞ്ഞനേരം

കുളിച്ചത്താഴമുണ്ട്

അത്തറുപൂശിമണത്ത കുപ്പായവുമിട്ട്
ഏതോ അറബിക്കഥയിലെ 
സുല്ത്താന്‍‍‍ രാജകുമാരനെപ്പോലെ

പുത്തന്‍മാരന്‍‍‍ ചാരേ

പട്ടുമെത്തയില്‍ വന്നിരിക്കുന്ന

പോലെ തോന്നി....

ഉള്ളിലേതോ കുസൃതിയൊളിപ്പിച്ച്

ആ വെള്ളാരം കണ്ണുകള്‍

നിശ്ചല ജലാശയത്തിലെ

പരല്‍ മീനുകളെപ്പോലെ

തുള്ളിക്കളിക്കുന്നുണ്ടല്ലോ....!

ലജ്ജപൂണ്ടവളുടെ മുഖം

തുടുത്തിരുന്നെങ്കിലും

കട്ടിലോരത്ത് കിടന്ന കിതാബെടുത്ത്

വെറുതെ മറിച്ചു നോക്കികൊണ്ട്

മറ്റേതോ ദുനിയാവിലെന്നവണ്ണം

പുതുപ്പെണ്ണിരുന്നു.......

അരുമയാമേതോ പക്ഷിയെപ്പോലെ...!

കൂട്ടിയും കിഴിച്ചുമിട്ടേതോ

അക്കഗണിതങ്ങളായിരുന്നതില്‍ മുഴുവന്‍

ഒട്ടും മനസ്സിലായതേയില്ല....

ഒപ്പനപ്പാട്ടിന്റെ താളം മാത്രം

ഖല്‍ബില്‍ മുഴങ്ങി കേട്ടു.....

മൈലാഞ്ചി ചിത്രമെഴുതിയോരാ

മൃദുലമാം കൈകള്‍ കവര്‍ന്ന്

ചിത്രശലഭങ്ങളെപ്പോലെ

പുതുമാരന്റെചുണ്ടിണകള്‍

ആദ്യമായാപൂമേനിയില്‍

മുത്തം പകരവേ......

ഉള്‍പ്പുളകങ്ങളാല്‍‍

കോരിത്തരിച്ചു പോയി

എത്ര സുന്ദരമീ ജീവിതമെന്ന്

വെറുതെ നിനച്ചു പോയി..

കൊച്ചു പെരുന്നാളായിട്ടിത്ര

നേരമായിട്ടൊന്ന് വിളിച്ചില്ലല്ലോ

അത്രമേല്‍ വെറുത്തു പോയോ..?

അപ്പുറം ജാലകപ്പടികള്‍ക്കിടയിലൂടെ

ചെക്ക് കളിച്ചു തളരുന്ന

കുട്ടികളുടെ തട്ടമിളകുന്നത് കാണാം

ചിത്രത്തുമ്പികളെപ്പോലെ

പാറുകയാണവര്‍

ചിത്രപ്പണികള്‍ ചെയ്ത് കൂട്ടുന്നുണ്ട്

പടച്ചോനവരിലും....!

മറ്റാരും കാണാതെ....

ഓര്‍ക്കുമ്പോള്‍ ആധിവന്നുള്ളില്‍

തീയാളുന്നു.....

പെട്ടന്നായിരുന്നല്ലോ.......

മേശപ്പുറത്ത് കരിമ്പൂച്ചപോല്‍

കെട്ടുറങ്ങിക്കിടന്ന ഫോണ്‍

ഉച്ചത്തില്‍ നീട്ടിച്ചിലച്ചത്

എത്ര ദിവസങ്ങള്‍ക്കു ശേഷമാണ്.....

ഒട്ടു പരിഭ്രമത്തോടെ

വെപ്രാളപ്പെട്ടെഴുന്നേറ്റ്

അപ്പുറമെത്തവേ

വീണ്ടും ഫോണ്‍ നിശ്ചലമാകുന്നു...

കൊച്ചു ഫോണ്‍ കൈയിലൊളിപ്പിച്ച്

കുട്ടികള്‍ പുറത്തൊളിഞ്ഞു നിന്ന്

അകത്തേക്കൊത്തി നോക്കുന്നുണ്ട്

അമര്‍ത്തിപ്പിടിച്ച ചിരിയുമായി....

ചായകുടിക്കേണ്ട നേരമാറിതണുത്തെന്നോ..!

കട്ടിലില്‍ നിന്നുമ്മച്ചിയെ
പെട്ടന്നെഴുനേല്പിക്കാന്‍

കണ്ടയൊറ്റ മാര്‍ഗ്ഗമാണന്നോ

ഒക്കെ ശരിതന്നെ......

ഒരു നിശ്ചലചിത്രം പോലെ 
നില്ക്കകയാണവള്‍....

ഫോണ്‍ വീണ്ടും ചിലയ്ക്കുന്നതും കാത്ത്.....