ഇനിവരാനുള്ളൊരാള്‍....

ഇനി വരാനാരെങ്കിലുമുണ്ടോ...?

ഇനി വരാനാരെങ്കിലുമുണ്ടോ...?

ശവമെടുക്കുവാൻ  സമയമാകുന്നു

സമയമാകുന്നു....

ഇടതിങ്ങി നില്ക്കുമാള്‍ക്കൂട്ട

ത്തിന്നിന്നിടയില്‍ നിന്നും

ചുമലിടിഞ്ഞൊരാള്‍

വിളിച്ചു ചോദിക്കുന്നു..

ഇടനെഞ്ചില്‍ കനല്‍

കോരിയിട്ടാ ചോദ്യമെരിയുന്നു

ഇനിവരാനാരെങ്കിലുമുണ്ടോ...?

നീണ്ടൊരിലമുറിത്തുണ്ടിൽ 

മിഴിയടച്ചങ്ങനെ.....

ഏതോ സുഖ സുഷുപ്തി

യിലെന്നപോൽ 

നീണ്ടുനിവർന്നുകിടക്കുക

യാണെൻ പ്രിയന്‍

നിറതിരിയുമായി.....

നിലവിളക്കെരിയുന്നുണ്ട്

പ്രിയനേ മിഴിതുറന്നെന്നെ

യൊന്നു നീ നോക്കുമോ

വെറുതെ......ഒരുമാത്ര മാത്രം.......

പുലരിയില്‍ പൂമെത്ത

വിട്ടുണരവേ നീ നല്കിയോരാ

ചുടുചുംബനമിപ്പോഴുമെന്റെ

കവിളില്‍ തുടിക്കുന്നുണ്ട്......

പറയുവാൻ  ബാക്കി വെച്ചേതോ

വാക്കുകള്‍ പാതിതുറന്ന

നിന്‍ ചുണ്ടിലിപ്പോഴുമുണ്ടല്ലോ....?

ഇനി വരാനാരെങ്കിലുമുണ്ടോ...?

ഇനി വരാനാരെങ്കിലുമുണ്ടോ...?

ഇനി വരാൻ   ഞാൻ മാത്രമേ

യുളളന്ന് ആരോ പറയുന്നുവല്ലോ...?

ഉദകക്രിയയ്ക്കൊടുവിലായി

ഒരുനുള്ളു പൂവും

ഉരിയ അരിയും

നുള്ളിയാ അധരങ്ങളില്‍

വെയ്ക്കുവാനായി....

ഇനി വരാനൊരാൾ  കൂടിയുണ്ട്...!

ഒരുപാട് നാളുകൾ 
കാത്തിരുന്നൊടുവിൽ 

പ്രിയനേ നിൻ  പ്രണയത്തിന്നടയാള
മായെൻ ഉദരത്തിൽ  മുളപൊട്ടിയതാണ്

അതുതന്നെയെന്നു  ഞാൻ  
തീർച്ചപ്പെടുത്തിയിട്ടും 

അധിക നേരമായില്ല
നിമിഷങ്ങളെണ്ണിയെണ്ണി
കാത്തിരുന്നതാണ് ഞാൻ
അരികിൽ  സന്ധ്യയിൽ  നീ 

വന്നണയുമ്പോൾ 

ഇറുകെപ്പുണർന്ന് നിൻ  കാതിൽ 

രഹസ്യമായി പറയുവാൻ...

വിധികളാം പക്ഷികള്‍

ചീര്‍ത്ത കൊക്കു പിളര്‍ത്തി

ഞൊടി വേഗത്തില്‍ 

നഖമുനകളില്‍ കോർത്തെടു

ത്തുകൊണ്ടു പോകുന്നു

പ്രിയമുളള സ്വപ്നങ്ങള്‍...
വ്യഥിദ ദുഃഖങ്ങൾ നിറഞ്ഞൊരീ 
ലോകത്ത് വെറുതെ 
ജനിക്കാതിരുന്നെങ്കിൽ.......

ഉൾക്കടൽ തിരതള്ളുന്നുന്ടെനിക്ക് 

സ്മൃതികളുമറ്റു പോകുന്നുണ്ടിട
ക്കിടക്കെങ്കിലും കേൾക്കാം 

ഇടതിങ്ങി നില്ക്കുമാള്‍ക്കൂട്ട

ത്തിന്നിന്നിടയില്‍ നിന്നും

ഉഷ്ണ വാതം പോലെ 
വന്നു വീഴുന്നൊരാ വാക്കുകൾ 

ഇനി വരാനാരെങ്കിലുമുണ്ടോ...?

ഇനി വരാനാരെങ്കിലുമുണ്ടോ...?

 

 

ഒരു അവിശുദ്ധ പ്രണയം.....

മഴപെയ്തു പെയ്തു തീരാതെ

പരിഭവിച്ചു നിന്നോരു

വിഷാദാര്‍ദ്രമാം സന്ധ്യയില്‍

ഞാനാദ്യമായി ഇരുളുമായി

പ്രണയത്തിലായി....

എന്നെക്കാളേറെ

കറുത്തതായിരുന്നിട്ടും

എന്നിലുമേറെ പ്രായമുണ്ടാ

യിരുന്നിട്ടും

എന്തോ വല്ലാത്തൊരടുപ്പം

എനിക്കവളോട്തോന്നി
തമ്മില്‍ തമ്മില്‍ ഞങ്ങള്‍
ഒന്നും മിണ്ടാതെ
നോക്കിയിരുന്നേറെ നേരം
ഒന്നും കാണുവാന്‍ കഴിഞ്ഞില്ലങ്കിലും
നിമിഷങ്ങളെണ്ണിയെണ്ണി കടന്നു പോം
ഏതോ ഘടികാര സൂചിതന്‍  
പിടച്ചില്‍ മാത്രം കേട്ടു.....

മന്വന്തരങ്ങള്‍ക്കുമുമ്പേ

ഈ വര്‍ണ്ണമനോഹരിയാം ഭൂമിയും

വിണ്ണില്‍ നിന്നവളെ

കണ്ണെടുക്കാതെ നോക്കും

സൂര്യചന്ദ്രന്മാരുമുണ്ടാകുന്നതിന്‍

മുമ്പേ

ഇരുള്‍...അവളിവിടുണ്ടായിരുന്നത്രെ...

എത്രയുഗാബ്ദങ്ങളോളം തനിച്ചായിരുന്നവള്‍
ഈ പ്രപഞ്ചത്തിന്‍ ഉഷ്ണ പഥങ്ങളില്‍
എത്ര യുഗപരിണാമങ്ങള്‍ക്ക്

മൂകമായി സാക്ഷ്യംവഹിച്ചതാണ്.....

കാര്‍കൂന്തല്‍ കെട്ടഴിച്ചിട്ട്
കരിനീല മിഴികള്‍ കൂമ്പി
നീലനിശീഥത്തിന്‍ മണിമഞ്ചലില്‍
അവള്‍ അലസശയനം നടത്തുമ്പോള്‍
ആ മടിത്തട്ടില്‍ വീണുറങ്ങാന്‍
ആരാധനയോടെ അഭിനിവേശമോടെ
വന്നണയുന്നൊരു കാമുകന്‍ ഞാന്‍.. 

എതു വസന്തത്തിന് പുലരികള്‍
വന്നുവിളിച്ചാലും
എതു ശിശിരനിലാവിന്‍
പാലൊളി ചിന്തുകള്‍
നിന്നു തുളുമ്പിയാലും
ഒട്ടും കുറയുകയില്ലാ
ഇരുളുമായുള്ളൊരെന്‍ പ്രണയം
അത്രമേലത് അസ്ഥിയിലുറച്ചു പോയി...



ഒറ്റയ്ക്കിരുന്നിരുട്ടത്ത്
പിച്ചും പേയും പുലമ്പുന്നത്
അത്ര നല്ല ശീലമല്ലന്ന്
രക്തബന്ധുക്കള്‍ പോലും
പറയുന്നുണ്ട്
ഇരുളിന്റെ ഹൃത്തില്‍
വിരിയുന്നോരുള്‍പ്പുളകങ്ങള്‍
ആരറിവൂ........?
 

ഇടവേളയ്ക്ക് ശേഷം തുടരും......

ഇടവേളയ്ക്ക് ശേഷം

വാര്‍ത്തകള്‍ തുടരും

ഇടതടവില്ലാതെ.....

ചടുലതാളത്തില്‍

കടുകുമണികള്‍ പോലെ

വാക്കുകള്‍ പൊട്ടിച്ചിതറും....

ഇടിത്തീ പോലൊരു

വാര്‍ത്തയുമായി

ഉടന്‍തന്നെ മടങ്ങിവരാമെന്ന്

പറഞ്ഞ് കളമൊഴി

മറഞ്ഞല്ലോ.....

മനസ്സിന് ഇടവഴികളില്‍

ലഡുമണികള്‍ പൊട്ടുന്ന

കാഴ്ചകളുണ്ടിനിയെന്നാലും

മടിപിടിച്ചിരിക്കേണ്ട

പോയൊന്ന്

നടുനിവര്‍ത്തി വന്നോളൂ....

പതിവായികാണുന്ന

തുടര്‍ക്കഥയുടെ രസച്ചരടു

പൊട്ടിയതിന്നരിശത്തില്

ആരൊക്കെയോ വിറളി

പിടിച്ച് നടപ്പുണ്ടായിരുന്നല്ലോ

ജപനാമങ്ങളൊക്കെയുപേക്ഷിച്ച്

മുതുമുത്തശ്ശിയും

പടിവാതിലില്‍ വന്ന്

മുറുമുറുത്തിരിപ്പുണ്ടല്ലോ..!.

കാര്യമാക്കേണ്ടതൊന്നുമൊട്ടുമേ

കരുതുവാനും മടിക്കേണ്ട

കൈയിലെപ്പോഴുമാ ചെറുപേടകം

ഇടയിലെവിടെയെങ്കിലുമൊന്നത്

മറന്നു വെച്ചാലോ

അതിക്രമങ്ങള്‍ക്കിടയുണ്ട്

കനിവുതോന്നി

കടന്നുകയറുവാനനുവദിച്ചാല്‍

തിരിച്ചിറക്കുകയസാധ്യം

പറയുന്നകേട്ടില്ലേ.....

പടപ്പുറപ്പാടുമായി....

ഇതിലെന്തിത്രരസം

ചൊറികുത്തിയിരിക്കും പോല്‍

ഒരേ വാര്‍ത്തകള്‍ ചാനലുകള്‍

മാറ്റിമറിച്ച് കണ്ടങ്ങിരിക്കാന്‍

അറിയുമോ അതിന്‍ രസം

നിലതെറ്റിവന്നൊരാ കരിങ്കല്ലിന്റെ

ഭ്രമണപഥമേത്

ഇടയില്‍ ആള്‍ക്കൂട്ടത്തില്‍ നിന്നും

പരിധിവിടുന്നോരാ

കൈകളാരുടേത്

കൊടിവെച്ചകാറില്‍ പറക്കും

മുടിയനാം മന്ത്രിയുടെ

വീടിന്നിറയത്തിടയ്ക്കിടെ കാണും

പെണ്‍ ചെരുപ്പുകളാരുടേത്

.......................................................

....................................................

പുകയുന്നുണ്ട്

ചോദ്യങ്ങളൊരുപാട്

പുകമഞ്ഞുപോലെ.....

കഠിനമാം ചര്‍ച്ചകള്‍ക്കൊടുവില്‍

വാക്കുകള്‍ മുട്ടി അടിതെറ്റിവീണ

നേതാവിന്റെ ദയനീയമാം

മുഖത്തുനിന്നും

ഉത്തരം കിട്ടുവാനിടയുണ്ട്

ചിലപ്പോള്‍..കാത്തിരിക്കാം

ഇടവേളയ്ക്ക് ശേഷം

വാര്‍ത്തകള്‍ തുടരും.....